E Hampfle Schnitzelbänk

Die Zuezognä, mini Schnitzel-Fründe, fasnächtlich assimiliert,
singe da Joohr leider nümm, gälte trotzdem als integriert.
Wurde alli Zuezognä a de Zuezognä sich e Biispiel ne,
würd’s hüt, morn und übermorn Holzofebrot vom Auki geh.

E ETH Studie het bewiese, KI wird täglich g’nützt
Alli unter 5e-Zwänzgi fühle sich vo KI im Läbe g’stützt

Ich bruch KI scho sit jehär – verstand de totali Wahn
Immer dra dänke, was KI bedütet, stoht für – Kym Ivan

FRIDOLIN

Bym Auki stiegt dichte Rauch usem Chämi, verdunklet der Sunneschy
Dinn frogt d’Liselott’ isch es recht e so, oder dörfs e bits dunkler sy?
Nei, s isch scho guet, aber i ha gmeint me dörf kei Füür meh mache
D’Liselott meint, e bitsli stinke muess es – mir sy Nochbere am noche bache

Isch das do gopfriedstutz e Kiosk oder öppe e Beiz?
Im Schwümmbi z Möhli go esse, das het e bsundre Reiz
Bym warte uf die Delikatesse regt sich my Mage a
Vo dem feine Pommfrit-Duft und dem Gschmäckli vo nebe dra

MORALTANTE

Gits bi uns jetzt aumol es Bordell
Schliesst d Stadt das wieder, zimli schnell
Uns bringt das jo grad fest zum stuune
Ihri Stärchi hends sust ned bim Puff ufrume

De Auki macht z Möhli nüm Holzofe-Brot
Es rauchi z fest, s ganz Dorf gseht rot
Do chönne mir Zähringer numme lut lache,
Mir wüsses scho lang, Möhlmer sind ned ganz bache

LÜÜCHTTÜRM

An dere Stell do hämr welle ein vo däm do bringe
Doch offesichtlich gfallts ihm nid, wenn mir vo ihm diend singe,
denn lömr das, es isch egal mir wänd mit däm nid chäre,
und lönd ihn witer schmolle mit sine Teddybäre!

Bi eus im Roothuus unde, wird dr Franco Mazzi notürlich fehle,
das chönne mir nach allne Johr au nid ganz verhehle!
Trotzdem isch es an dr Zyt dass er duet d Finke chlopfe
Nach 20 Johr duet s Getriebe halt doch e chli verstopfe.

ROOTHUUS-SCHNÄPFE

Bonjour Monsieur Shaqiri tönt’s in Lausanne vor em Gricht
Votre maison est trop grande dr Sherdan schnallt’s wie immer nid
Mir Chaipirinhas drucke Düme das chunt guet dir wärdets gseh
Chaiseraugscht cha uf ihn verzichte und Rhyfälde zellt ein IQ meh

CHAIPIRINHAS