Bisch früehner mitere Maske in Bank ineghetzt Händ sofort alli d’Händ gege Himmel gstreckt.

Hüt isch e Maske träge ganz normal und du hesch für de Mund- und Naseschutz, au in de Form und Farb die Qual der Wahl.

Zum Schutz vo dir und mir träg ich die Maske gern und es brucht dodefür au kei Gegedemo im Bundesbern.

Mir löhnd eus eso nit unterkriege, mir wänd und werde de unsichtbari Find in Griff scho kriege mir helfe au dene die dur Corona jetzt sind in Not denn mir sitze alli im gliche Boot.

Mir bitte um Vorsicht, Umsicht und gsunde Menscheverstand und hoffe das Virus isch bald verbannt…und verbrannt…. denn hei au mir eusi Fasnacht wieder in eusere Hand.

Maske gits in allne Farbe und i allne Forme ich träg mini wie sichs g’hört vor der Schnuure vorne s’Sprichwort «haltet die Ohren steif» find ich iwandfrei denn ohni stiffi Ohre isch d’Schnuure wieder frei.

Kei Schnitzelbank kei Guggemusik kei Konfetti und kei Umzug wo duet starte eine het zue mir gseit ihns freut’s jetzt chotzt und schifft das Johr

keine i mi Vorgarte d’Meinigsfreiheit hejo de gseht d’Fasnacht halt e so, hesch pro und contra überall bliib locker cool denk fasnächtlich global die ganzi Welt isch doch grad de gröschti Maskeball.

Wäg dem Wirrwarr um das Corona wärde laufend neui Massnahme beschlosse Usgangssperri, deheime bliibe das macht einsam und ganz klar ha ich au mehr gsoffe. Während em händwäsche hani grechnet und s‘Resultat het mi knallhart troffe durs händwäsche ha ich viel viel mehr Alkohol konsumiert wie selber gsoffe.

A der Abstimmig säge d’Schwizer jo und händ de Vaterschaftsurlaub agnoh au neui Kampfjet chaufe isch durecho jetz chame ins Uswahlverfahre go und wenns denn heisst e Agriff droht mir bruche jetz die Kampfjet ganz gschwind wird kei Jet in Himmel stiege will alli Pilote usgrechnet jetz im Vaterschaftsurlaub sind.

Wäge Corona lütet z’Nacht eine ganz nervös und ufgregt ufe Polizeiposchte a es isch doch verbote mi Nochber macht Party ich denk rämmi dämmi oder tra-lala was genau frogt de Schugger, isches rämmi dämmi oder tra-lala, formuliere sie das klar ich muess genaui Agabe ha, denn rämmi dämmi oder tra-lala, sind zwöi verschiedeni Formular.

Schüfeli und Wüscherli